Pretschs da bigliets

Pass da 3 dis: CHF 140.-
Pass dal di Venderdi: CHF 50.-
Pass dal di Sonda: CHF 80.-
Pass dal di Dumengia: CHF 60.-
Pass dal di scolars e scolaras: CHF 20.-
Affons tochen 6 onns gratuit

La moderna «TRIBUNA SOLO»  
Inspirai dalla «tribuna solo» da Zarli Carigiet che vegn presentada ell’exposiziun «Davon e davos las culissas» ella Casa Carigiet, inscenein nus la comica dil mintgadi sin pliras tribunas minimalas en casa e contuorn e presentein geners da tutta sort en lur differentas fassettas.

DAPERTUT
Cun elements da tribuna mobils transformein nus streglias, plazzas e la Casa Carigiet e siu contuorn en ina scenaria spectaculara. Sche musica, cabaret, teater, circus, sault ni performance – tribuna e publicum daventan in’unitad. Il program unescha l’identitad locala cul flair naziunal ed internaziunal.
Gudi treis dis plein highlights: novas creaziuns ed omagis a Zarli Carigiet, open stages per talents locals e muments participativs en ils quals Vus astgeis ir sin tribuna. Nus envidein Vus da guder igl usitau e scuvierer il niev.

Datas dil festival
Venderdis, ils 28 tochen dumengia ils 20 d’uost 2026
Informaziuns detagliadas suondan proximamein.

Liug
Casa Carigiet, Plaz Cadruvi 36,
ed ulteriurs loghens d’acziun a Trun

Flyer

Program da bialaura 
Program da malaura

Suenter onns sepresenta el puspei inagada cun sia band en sia patria a Trun – Aura ei il perfetg album persuenter. All’entschatta steva numnadamein la damonda « co tuna patria oz ? »

Per Mattiu ei la musica caussa da famiglia. Ella ei buca mo expressiun d’individualitad, mobein ina ierta communabla che vegn dada vinavon da generaziun a generaziun. En sia famiglia vegn cantau, tedlau, partiu. Vuschs s’entaupan, s’entretschan, portan regurdientschas. Quella stretga collaboraziun, quei fladar e tunar communabel, marchescha il musicist e cantadur naven dall’entschatta e fuorma il fundament emoziunal da sia ovra.
Musica ei per Mattiu mai finamira en sesez, mobein colligiaziun: denter carstgauns, denter vargau e present, denter dadens e dadora

Sonda, 20:00 en Sala da cultura

Sche Corin Curschellas creescha in program a posta per il festival – dedicaus a Zarli Carigiet – lura eisi clar – quei vegn grondius.

Corin Curschellas ei ina appariziun singulara ella scena da musica svizra. Sin siu viadi tras temps e stils dalla musica moderna ha ella creau in agen mund. La cantadura, musicista, cumponista, textura ed actura grischuna e cosmopolita, autoironica, multifara ed inspirada a moda extraordinaria.

Per il festival da tribuna Dapertut metta ella ensemen cun l’accordeonista Patricia Draeger – ina enconuschidra dil cabaret Cornichon – in program accordaus specialmein a Zarli Carigiet. Stilisticamein semovan Curschellas e Draeger a moda suverana denter chanson, rock, jazz ed improvisaziun libra.

Venderdis, 18:30 el curtin Carigiet

Las buobas Scherrer arvan ils cors cun lur vuschs. Semplamein vegnir, tedlar e schar tuccar.

La famiglia Scherrer da Trun viva musica – dapi generaziuns. Suenter «Las soras Scherrer», ch’ein vegnidas enconuschentas ils onns 1990 lunsch sur la regiun ora, stat ussa era la proxima generaziun sin tribuna: «Las buobas Scherrer».

Maria, Clara Maria, Giulietta, Anna Catrina ed Eva Luisa creschan si cun musica – marcada e purtada d’ina casa paterna nua ch’il far musica professiunal sauda tier il mintgadi. A Trun presentan las tschun giuvnas cantaduras in program cun canzuns romontschas e texts elegi ord la litteratura. Fin, vigurus e damaneivel – siu cant va a cor.

Sonda, 11:30 en baselgia e 17:15 el curtin Carigiet

Alexi e Marcus – els s’audan sempalmein vitier.

Quasi in giug da casa daventa la cumparsa dad Alexi e Marcus. Dapi varga curonta onns ein els sin viadi cun lur canzuns – magari savens, magari meins savens. Perquei selegrein nus tut special ch’els ein dalla partida al festival da tribuna Dapertut. Tgi ch’enconuscha aunc buc els: En lur canzuns schaian legria e tristezia, amur e gretta, melanconia e protest fetg datier in da l’auter. La speronza dominescha denton adina. Els dechantan ils cuolms ed ils temps vargai, mo sespiardan era ellas profunditads digl esser. Mintgaton striuneschan els in surrir en fatscha, mintgaton dattan els da patertgar. Musicalmein slargian Alexi Nay e Marcus Hobi lur spectrum cun collaborar cun ulteriuras musicistas e musicists – a Trun vegnan els a sepresentar sco quartet.

Dumengia, 11:30 e 17:15 el curtin Desax

Fai Baba, il project da solo dal musicist turitges Fabian Sigmund, stat dapi 2010 per canzuns intensivas, independentas e muments impressiunonts live. 2026 festivescha igl album Sad & Horny che vegn celebraus internaziunalmein siu giubileum da 10 onns.

Igl avrel ei Fai Baba solo cun ghitara acustica sin viadi en Tiaratudestga ed en Svizra: concerts intims plein ruaus, profunditad, purtai d’energia presenta.

Ei setracta da seras che laian spazi per dentertuns, per historias denter las canzuns, pil trer flad communabel el mument. Reducidas sigl essenzial, aviartas, vivas e plein preschientscha.

Venderdis, 21:45 el curtin Carigiet

Flurin Caviezel anfla ils plaids adattai – metta quels el dretg liug e malegia entuorn quels sia musica – ordlunder dat ei in program unic e fin.

Zarli Carigiet, oriunds da Trun, vala sco il pli impurtont cabarettist grischun dal 20avel tschentaner. El era in romontsch, ha denton surtut cun siu marcant tudestg grischun contonschiu renum naziunal. En ses programs concepì aposta per Trun mida era il musicist e cabarettist grischun Flurin Caviezel denter romontsch e Churertütsch. Sco usitau gioga la musica ina rolla centrala – cun ina particularitad: Per l’emprema gada vegn Caviezel ad interpretar canzuns da Zarli Carigiet.

Dumengia, las 16:00 el curtin Carigiet

Sche in homo humus sentaupa cun in cabaretist da Trun – co po quei pomai tunar?

Il cabarettist Luca Maurizio pren nus sin in viadi satiric dal umanissem al humusissem – denter grascha, microbas e damondas da pussonza. Siu program a Trun ei d’ina vart inspiraus da filosofs dad oz, da l’autra vart dil destin da viver dalla classa bassa en Bregaglia dil davos tschentaner. Plinavon selai Luca Maurizio inspirar dil cabaret da Zarli Carigiet e raquenta buca mo d’ina nova specia: il Homo Humus – mobein lai era entupar quel cun Zarli. Humoristic, profund e magnific uiersch.

Venderdis, 19:30 el curtin Museum Sursilvan

Cuntradicziuns da nies temps – cun in surrir, cun satira e commuentont.

La societad da nozza spartida, il schampagner cauld – e cuort avon la maridaglia resta era aunc la nav da nozzas fitgada amiez il Lag da Constanza. Tgei far pia? Tätschmeister Muheim emprova da spindrar la situaziun e tegn in plaid che duei buca mo reconciliar ils hosps, mobein l’entira carstgaunadad. Damogna el quei? Ina show davart las cuntradicziuns da nies temps, survida cun tschaghignadas muheimas – satiric, enivront, commuentont.

Victur dil taur da Salzburg 2024

Sonda, 17:15 el curtin Desax

Foto Alexandra Theiler

David Flepp curatescha ed animescha acturs ed acturas dalla regiun da sepresentar cun lur interpretaziun dil mintgadi – inspirai da Zarli Carigiet.

Il pedagog da teater ed actur David Flepp che habitescha a Danis-Tavanasa sededichescha sper sia lavur sin tribuna e sin preit teila dapi onns intensivamein alla lavur da teater cun affons e giuvenils. Pil festival da tribuna Dapertut curatescha el las uniuns da teater dalla Surselva: El inspirescha ellas da sefatschentar cun Zarli Carigiet ed accumpogna ellas da purtar situaziuns quotidianas en formats cuorts sin la Open Stage.

Venderdis, 20:45 el curtin Carigiet e plaz baselgia e sonda allas 13:45 el curtin Desax ed egl areal dalla fabrica

Esses pinai per in experiment? Affons transformeschan streglias e gassas a Trun en ina scenaria spectaculara.

Vegni cun nus sin ina spassegiada surprendenta dil vitg da tempra speciala. Tras Trun midan affons il vitg en ina tribuna viventa: Sin differentas staziuns presentan els lur atgnas historias naschidas el cuors da vacanzas da stad dil JTG. Sut la bitgetta dalla pedagoga da teater indigena Angela Collenberg han ils giuvens talents schau liber lur fantasia. Seschei infectar da lur plascher da giugar ed experimentei Trun ord ina perspectiva dil tuttafatg nova.

Nus selegrein da vossa viseta – entrei!

Dumengia, 13:30 el curtin Carigiet

Parblex! ei in program che fascinescha in public internaziunal – sin lur turnea tras l’Europa fan els halt a Trun – exclusivamein.

Dapi vegn onns tilan els in l’auter vid il tricot – colligiai d’ina cumplicitad inscenada e d’ina carezia senza cumpromiss per la sgnocca precisa. Onn per onn affirmeschan Jean Paul Lefeuvre e Didier André quella vischinonza cun in circus nunagitau, artisanalmein fin – enzatgei sco „Slow Circus“. El niev toc seconcentreschan els sin minimalissem radical e prendan neunavon quei ch’ei el luvratori il pli giudem: in’aissa, ina palutta da miradur, ina rucla da boule, in marti da plazzal … Cun inschign ruasseivel ed acribic transfurmeschan els quellas caussas apparentamein banalas. En moviment e glisch daventan els cumpogns da giug – e meinsvart ils stars per propi dalla sera. Cun pauca breigia, mo grond effect dat ei in mund, el qual il malnizeivel ed il ridicul cumbattan in cun l’auter, igl absurd cupetga el comic – entochen ch’ei cumpara alla fin poesia.

Sonda, 15:30 e dumengia allas 14:30 el curtin Desax

Scriver cun in rom sin pupi, malegiar cun balls e tut en ina performanza cun il publicum.

Scriver cun in rom sin pupi, dessignar duront schonglar cun ballas bugnadas avon en tenta ni fierer cotgla sin teila – Fabian Krestel fa veseivel il moviment. Cun moviments controllai dad omisdus mauns e geometria clara colligia el schonglar e dessignar ad in agen lungatg visual. Il publicum mira tier e vegn per part involvius – ils musters restan sco ovras independentas. Denter performance ed exposiziun – in fascinont work in progress.

Venderdis, 17:30 e sonda allas 12:00, divers loghens

«Heinz Baut» ei ina performanza che va en l’altezia. Vus essas part live dalla construziun d’ina tuor da bastuns e sugas – pass per pass en l’altezia e pass per pass puspei da retuorn.

En in spazi aviert schai in sac, ord il qual penda ina suga – entuorn quel in camp da stangas da fraissen. Heinz baghegia ordlunder live ina construcziun aulta, fragila: El reiva, noda e catscha petga per petga e testescha cun siu tgierp adina puspei ballontscha e stabilitad. Il publicum experimentescha la construcziun pass per pass e vesa co la sculptura crescha, semuenta e reagescha sin las pli pintgas midadas. Suenter entginas uras contonscha la tuor siu punct culminont – silsuenter vegn tut puspei demontau en successiun cuntraria. Quei che resta ein petgas e sugas sco impronta tgeua dall’acziun.

Sonda, 13:00 plaz sper il Spazi Spescha e dumengia, 12:00 sin plaz baselgia

Quirina Lechmann e Gianin Conrad sveglian sentiments cun lur tuns e suns ed envidan il publicum da separticipar.

Remembering Mountains – tgei regorda nus vid ils cuolms? tun? tun? Successiuns ni segls da cant? Ina tiba da cuolm construida sez, zenns e vusch meinan da tuns tradiziunals tier cant d’opera e sound experimental. Tgei sentiments vegnan svegliai leutier e co secumporta quei? Nua cala la muntogna e l’aria muntagnarda e nua entscheivan ellas?

Sonda, 14:45 el tunnel Spescha

Ina gaglina ed ina uolp – quels animals enconuschin nus. Biophilia mischeida quei che nus enconuschin daniev – a moda surprendenta e cun humor.

Pil festival a Trun va BIOPHILIA sin viadi el Grischun en ina versiun da viseta speciala: Uolp e gaglina bandunan lur percurs usitau e semischeidan denter ils gasts dil festival. Denter sentupadas, observaziuns e muments performativs surprendents sespleiga in dialog viv cul publicum.

Uolp e gaglina sfunsan sco hosps denter ils presents, enqueran contact, observan e vegnan sezs observai. La versiun da viseta da BIOPHILIA envida da veser da niev maletgs familiars e da viver il festival ord ina perspectiva nunusitada – surprendent, humoristic e damaneivel.

Venderdis, 17:30 e dumengia, 12:00 el curtin Carigiet