La vischnaunca Trun – liug da naschientscha digl artist – ei s’engaschada per la sculptura ed ha mess a disposiziun il terren. Ils artavels e numerus sponsurs han procurau per la finanziaziun dall’ovra ch’ei vegnida inaugurada il matg 2013. La pli gronda sculptura transibla en Svizra sesanfla enamiez il mund alpin dalla Surselva e fuorma ensemen cun ella in’unitad suprendenta. L’acustica dadens ei fenomenala ed inspirescha adina puspei artists ed artistas da crear e presentar concerts e performanzas. Vus essas cordialmein beinvegni ell’OGNA a Trun!

La fuorma monumentala dalla sculptura ei impressiunonta: L’ovra viers tschiel aviert ei 48 m liunga, 30 m lada e 5.5 m aulta. Il spazi intern, suleraus cun in sempel terren marmus, ei accessibels neu dil sid tras in’avertura da preit. Las preits dadens ein cuvretgas cun grondas picturas muralas sco quei ch’igl artist haveva previu en siu model. En certs loghens dadens sesanflan plasticas. Il num OGNA deriva dall’ogna che crescha sper la sculptura. Broschura dall’OGNA

Matias Spescha ha elaborau avon sia mort la construcziun e concepziun detagliadamein. El ha fixau sias ideas en fuorma da models e skizzas e planisau tut cun ils architects Vincenz + Weishaupt da Glion. Aschia eis ei stau pusseivel da realisar il project tenor la visiun digl artist e quei a moda autentica. Las lavurs da construcziun entscheivan il matg 2012 e tschentan aultas pretensius all’interpresa da construcziun indigena. In onn pli tard vegn la sculptura inaugurada.

«Adina cura che jeu entrel ell’OGNA, hai jeu il sentiment da sturnizi ed jeu sun danovamein impressiunada dalla dimensiun dalla sculptura. Mi’egliada tacca buc vid las preits cun sias picturas muralas mobein va ad ault e suonda igl ur dall’aulta sculptura. Jeu contemplel ils cuolms, il tschiel e las neblas.», di la harpinista Estelle Costanzo. Estelle Costanzo, harpa Alicja Pilarczyk, violina Hillel Perlman + Wilma Puentes Linares, sault Emilie Cottam, decoraziun 30 e 31 da fenadur 2021