Il dialog da Corsin Fontana cun Matias Spescha secumpona da lavurs da dessegn e graficas, marcadas dalla tscherca d’ina reducziun radicala dil lungatg dil maletg sin ils elements impurtonts.

Adressa
Spazi d’art Matias Spescha, Via Fabrica 13, 7166 Trun

Temps d’avertura
Dils 14-6 tochen ils 24-8, mintgamai venderdis tochen gliendisdis 14:00-17:00

Vernissascha
Sonda, 14 da zercladur 2025, 14:00-17:00

Entrada 
Regular CHF 10.–, giuvenils ed affons da 7-20 onns CHF 5.-. Entrada libra per commembers da Trun Cultura e per affons tochen 7 onns.

Tichet cumbina cul Museum Sursilvan Cuort Ligia Grischa (valveivel tochen la fin dall’exposiziun) CHF 17.- / 8.-

Arrivada
cul tren: staziun Trun, 10 min. a pei
cun auto: parcadis avon casa communala ni all’entschatta dil vitg vis-à-vis il Museum Sursilvan.

Flyer dall’exposiziun

Corsin Fontana ha ina speciala relaziun cun Matias Spescha ch’ei colligiada fermamein cun ina capientscha da sesez sco artist. Sco scolar dil scalem superiur eis el seconfrontaus per l’emprema gada cun Matias Spescha ch’era envidaus en scola cul giavisch dad avischinar ils giuvenils agl art. Impressiunaus dalla persuna e si’ovra sesenta il giuven Corsin confirmaus en siu clom digl art.

Ell’ovra da Corsin Fontana dominescha il lungatg dil maletg concret en monocromas e strentgas graficas linearas e dessegns. Ses maletgs en ieli da grond format dattan muort la massa da colur l’impressiun da  caracter quasi sculptural malgrad lur sempladad.

Tier Matias Spescha giogan ils squetschs grafics gia dapi ils onns 1960 ina gronda rolla en si’ovra. L’influenza dad experientschas cun plasticas el spazi  reducescha il lungatg formal plaunet sin in minimum ferton che la bidimensiunalitad dalla surfatscha sesarva pli tard ad ina nova tiarza dimensiun virtuala.

Tiels dus artists croda la restricziun dils mieds da formar si, specialmein la reducziun sin ina certa colur e claras lingias che s’orienteschas agl ur dil fegl. Ellas ovras dad omisdus secolligia l’abstraziun a moda paradoxa cun experientschas sensitivas che semanifesteschan ord la relaziun concreta da colur, glisch e spazi.

L’exposiziun muossa differents maletgs e squetschs grafics sco era dus gronds maletgs dad ieli ord l’ovra da Fontana ensemen cun impurtonts squetschs grafics da Spescha che cumpeglian bunamein in miez tschentaner.