Uonn sesarva il SPAZI SPESCHA agl art contemporan.

Il focus dall’exposiziun dubla cun MATIAS SPESCHA / ESTHER MATHIS – ESPACES IMAGINAIRES schai sin in tema ch’ei impurtonts per omisdus artists: il spazi e la percepziun da tal.

Da Matias Spescha (1925-2008) vegnan installaziuns dil spazi dall’entschatta dils onns 1980 presentadas. Esther Mathis (*1985) creescha per l’exposiziun ovras che reageschan sin il spazi d’exposiziun plein glisch. Omisduas posiziuns envidan a perscrutar ils spazis reals ed imaginai.

Flyer

ESPACES IMAGINAIRES fa il spazi visual per tema:
Contribuziun artttv dils 10-5-2024

Esther Mathis – Die unendliche Leichtigkeit des Aluminiums: Kunstbulletin 7 – 8 /2024

Esther Mathis fa part d’ina giuvna generaziun d’artistAs che integrescha spazis, lur cuoz dil temps ed eveniments audiovisuals en lur ovra, suondond quels aspects en lavurs d’installaziuns ni videos. Esther Mathis (*1985) ei carschida si a Winterthur. Ella ha studegiau 2007 alla School of Visual Arts a New York e terminau il studi cul bachelor en fotografia 2008 agl Istituto Europeo di Design (IED) a Milaun. Il Master of Fine Arts ha ella absolviu 2015 alla scol’aulta d’art a Turitg (ZHdK). Dapresent lavura ella vid siu PhD alla ZHdK en cooperaziun cun l’universitad d’art a Linz cul tema „Licht lenken“. Ella viva e lavura a Turitg. Biografia

Fotos: Lucia Degonda

«Da principi fuss il pli ault nivel digl art contonschius, sche mi’ovra resta leu, nua che jeu erel, cura che jeu mon.»
(Matias Spescha, 2006)

Il giavisch da Matias Speschas ch’el ha exprimiu avon sia mort ei daventaus cumpleinamein realitad. Suenter che siu project a cor, la sculptura monumentala OGNA sut tschiel aviert, ei vegnida realisada ed inaugurada posthum igl onn 2013 Trun datier dalla riva dil Rein, anfla precis 10 onns pli tard siu entir relasch artistic ina nova dimora ella patria digl artist. Aschia havein nus preparau ina spaziusa halla d’exposiziun plein glisch ell’anteriura fabrica da ponn.

L’exposiziun d’avertura da SPAZI SPESCHA muossa Matias Spescha (1925-2008) a moda e maniera sco quei ch’ins ha aunc mai viu el en Svizra.