El center dall’exposiziun da Gaspare O. Melcher stat – sin fundament da si’entupada cugl «alphabet poétique» da Matias Spescha – la profunda reflecziun dad omisdus artists partenent ils principis digl uorden dalla conzepziun da maletg e spazi.

Temps d’avertura
Venderdis – gliendisdis, 14:00-17:00

Vernissascha
Sonda, 15 da mars 2025, 14:00-17:00. Program

Entrada
carschi CHF 10.– / 7-20 onns CHF 5.-. Entrada gratuita per commembers da Trun Cultura e per affons tochen 7 onns

Ticket cumbinau cun Museum Sursilvan Cuort Ligia Grischa (valeivel duront las exposiziuns da 2025) CHF 17.- / 8.-

Arrivada
Tuttas informaziuns anfleis Vus sut viseta.

flyer dalla exposiziun

Exposiziun
Gaspare Otto Melcher perscrutescha en sias ovras serialas il lungatg dil maletg e lur ragischs che sesanflan tenor siu meini ella prehistoria, veseivlas era ellas scartias da maletgs antics sco «ideographische Grundgerüste». Aschia vegn el tschaffaus dalla scuntrada cugl «alphabet poétique» da Matias Spescha e siu lungatg dil maletg che presenta per el medemamein leschas fundamentalas dalla relaziun maletg e spazi.

En sias atgnas ovras creescha Melcher cun agid dalla tecnica da cumpressiun dils segns ideografics fuormas fetg cumplexas ch’el declinescha a moda d’in regal da cumposiziun sin pupi ni sin teila. En sias serias sesviluppeschan quels sistems da segns a texts abstracts, ch’ein – cuntrari alla scartira usitada – buca da leger linear, mobein illustreschan el medem mument ideas e patratgs cumplexs.

Cuntrari alla cumpressiun dil mied figurativ da Melcher anflan ins tier Matias Spescha la tscherca dalla reducziun sin igl essenzial. Quei ei bein da veser ella creaziun grafica tras fuormas e lingias ch’ein la basa da siu «alphabet poétique» da 1979.

Ell’exposziun actuala tschercan las ovras da Melcher, a post creadas, il dialog cun las ovras da Spescha dils onns 1980 e  1990. En connex cun quella exposiziun ha liug ils 3 da matg 2025 in discuors cugl artist  e dr. Beat Stutzer.