Spazi Spescha
Halla d’exposiziun e depot dil relasch ell’anteriura fabrica da ponn a Trun
La fabrica da ponn Truns SA ei vegnida fundada 1912 da Fidel Tuor ed ha giugau duront biars decennis in’impurtonta rolla per Trun e la regiun. Ils onns 70 occupava la fabrica varga 400 conluvrers e conluvreras. Il problem dil liug, sbagls dil management ed en emprema lingia la ferma concurrenza neu digl ost meinan 2001 deplorablamein alla serrada dall’interpresa.
La sminuaziun dalla populaziun a Trun ei per part stada la consequenza da quei fatg. Trun ei stau duront decennis in dils pli impurtonts posts industrials dil Grischun ed il pli grond en Surselva. L’industrialisaziun ha giu per consequenza che la populaziun da Trun valeva sco pli progressiva en cumparegliaziun cun las ulteriuras vischnauncas ella regiun.
Ord: “Trun – vargau e present”
In spazi per exposiziuns dall’ovra da Matias Spescha
Ord l’anteriura halla da producziun dalla fabrica da ponn Truns SA – in baghetg industrial dils onns 1960 – daventa la halla d’exposiziun SPAZI SPESCHA.
Premissa per la restructuraziun da quella halla da betun ei stada che l’ovra da Matias Spescha possi vegnir presentada ed exponida a moda optimala. Aschia han la curatura Venice Spescha ed il curatur Markus Hilfiker realisau en stretga collaboraziun cul biro d’architectura interna gasser, derungs in concept dil spazi adequat allas ovras per part monumentalas dalla fasa tardiva digl artist.
Cun SPAZI SPESCHA ei ina localitad aviarta ed inundada da glisch vegnida scaffida, nua ch’igl art da Spescha sepresenta a moda excellenta aschia ch’el daventa in unic eveniment visual.
In spazi per sentupadas
Ella gronda anteriura halla industriala da 1’000 m2 vegn l’ovra da Matias Spescha mintg’onn presentada sut in auter aspect.
La halla proscha la pusseivladad per installaziuns che cupeglian igl entir spazi, per grondas picturas e per ovras pli pintgas sco dessegns e stampats grafics.
Las exposiziuns vegnan concepitas sco projects individuals ed en sesez consistents el ciclus da midadas annualas. SPAZI SPESCHA ei pia buca in «deposit public», mobein el sveglia danovamein interess e novas relaziuns. L’ovra da Spescha ei bein adattada da vegnir contemplada en different context artistic e digl art historic e possibilitescha aschia sentupadas animontas era cun autras posiziuns digl art.