OGNA
Aviert per tuts
La vischnaunca Trun – liug da naschientscha digl artist – ei s’engaschada per la sculptura ed ha mess a disposiziun il terren. Ils artavels e numerus sponsurs han procurau per la finanziaziun dall’orva ch’ei vegnida inaugurada il matg 2023.
La pli gronda sculptura transibla en Sivzra sesanfla enamiez il mund alpin dalla Surselva e fuorma ensemen cun ella in’unitad suprendenta. L’acustica dadens ei fenomenala ed inspirescha adina puspei artists ed artistas da crear concerts e performanzas.
Vus essas cordialmein beinvegni ell’OGNA a Trun!
Igl artist davart Ogna
«En ina serraria a Winterthur hai jeu engartau 1996 in bischel da fier. Jeu hai supplicau il fravi da taglair empermiez tal e lutiar el danovamein ensemen. Aschia ei l’idea naschida da scaffir ina nova plastica.
Quella fuorma fascinonta ei stada onns ora a mi en memoria ed il giavisch da realisar ina sculptura da betun ei carschius pli e pli. Che mia vischnaunca burgheisa demuossi interess da schar realisar quell’ovra sin siu intschess ha fatg grond plascher. Igl ei per mei ina honur d’astgar schar anavos in’ovra ch’ei da tut temps e per mintgin accessibla.
Matias Spescha, 2007
Ovra monumentala OGNA
La fuorma monumentala dalla sculptura ei impressiunonta: L’ovra viers tschiel aviert ei 48 m liunga, 30 m lada e 5.5 m aulta.
Il spazi intern, suleraus cun in sempel terren marmus, ei accessibels neu dil sid tras in’avertura da preit.
Las preits dadens ein cuvretgas cun grondas picturas muralas sco quei ch’igl artist haveva previu en siu model. En certs loghens dadens sesanflan plasticas.
Il num OGNA deriva dall’ogna che crescha sper la sculptura.
La sculptura
Ovra posthuma
L’entschatta 2008 semetta la gruppa alla tscherca dalla finanziaziun. Duront quellas preparativas miera Matias Spescha nunspitgadamein il zercladur 2008. Collaboraturs ed artavels ein d’accord da cuntinuar cun la realisaziun da quella unica ovra.
La Fundaziun OGNA, a post scaffida per quei intent, surpren quell’incarica suenter la mort digl artist.
Igl 1. da matg 2012 ha l’emprema palada liug. Ils 4 da matg 2013 vegn OGNA inaugurada ed ei dapi lu accessibla a tut temps per mintgin.
Prezisas indicaziuns
Matias Spescha ha elaborau avon sia mort la construcziun e concepziun detagliadamein. El ha fixau sias ideas en fuorma da models e skizzas e planisau tut cun ils architects Vincenz & Weishaupt da Glion.
Aschia eis ei stau pusseivel da realisar il project tenor la visiun digl artist e quei a moda autentica. Las lavurs da construcziun entscheivan il matg 2012 e tschentan aultas pretensius all’interpresa da construcziun indigena. In onn pli tard vegn la sculptura inaugurada.
Collaboraturs
Planisaziun e controlla dalla lavur sin incarica dal fundaziun OGNA:
Vincenz + Weishaupt architekts AG, Glion
impressari:
Beer SA, Rabius
Construcziun e montascha dallas plasticas endadens:
Fis Guldimann, Trun
Picturas muralas dadens:
Marcus Schmed, Trun, Venice Spescha, Turitg
Coordinaziun:
Giusep und Renata Decurtins-Deplazes, Trun
Impressiuns d’events vargai
Sut tschiel aviert – sault + musica
«Adina cura che jeu entrel ell’OGNA, hai jeu il sentiment da sturnizi ed jeu sun danovamein impressiunada dalla dimensiun dalla sculptura. Mi’egliada tacca buc vid las preits cun sias picturas muralas mobein va ad ault e suonda igl ur dall’aulta sculptura. Jeu contemplel ils cuolms, il tschiel e las neblas.», di la harpinista Estelle Costanzo.
Estelle Costanzo, harpa
Alicja Pilarczyk, violina
Hillel Perlman + Wilma Puentes Linares, sault
Emilie Cottam, decor
30 e 31 da fenadur 2021
Ensemble Origen
Clau Scherrer da Trun ei mintgaton sedumandaus co ei fuss, sche musica resunass ell’OGNA che luvrass cun ils medems mieds d’abstracziun sco Matias Spescha cun sia OGNA. Il pli bugen fetg veglia e nova musica.
CantadurAs: Sybille Diethelm, sopran; Judit Scherrer, sopran; Marian Dijkhuizen, alt; Lisa Lüthi, alt; Jakob Pilgram, tenor; Valentin Gloor, tenor; Retus Pfister, bass; Lothar Burtscher, bass
Direcziun: Clau Scherrer
Sonda, ils 27 da fenadur 2019, 20:00 uras
Dumentia, ils 28 da fenadur 2019, 11:00 uras