Spazi Spescha

Ell’anteriura fabrica da ponn a Trun vegn la ierta artistica digl artist da Trun Matias Spescha (1925–2008) presentada alla publicitad.

En quellas localitads ha Matias Spescha a sias uras fatg igl emprendissadi sco cusunz e luvrau plirs onns. 1951 eis el ius a Turitg ed ha luvrau sco pictur da placats pil kino Corso. Siu mentur Alois Carigiet che ha viu siu talent ha intimau el dad ir la via d’artist. Quella via ha menau el a Paris ell’academia de la grande Chaumière e pli tard en Frontscha dil sid nua ch’el ha luvrau sco artist.

Matias Spescha sesanfla ella retscha dad artists impurtonts dil Grischun denter Alberto Giacometti e Not Vital ed ei in artist svizzer renconuschiu dil temps suenter l’uiara. Si’ovra vegn recepida internaziunalmein. La fermezia da Spescha schai en sia concepziun extraordinaria dil spazi che semuossa alla fin da sia veta en la sculptura monumentala OGNA ch’ei il punct culminont da sias ovras. Il concept dil spazi ha el veta duronta transformau a moda suprendenta el medium bidimensional dalla pictura.

Concept da realisaziun Spazi Spescha

La cumissiun dil fatg ha elaborau duront la stad 2022 il concept da realisaziun ch’ei la basa per recaltgar ils daners necessaris.

scargar il concept da realisaziun

Purschida da squetschs da graficas

Ils quosts per la renovaziun ed igl endrizzament da SPAZI SPESCHA sco era la preparaziun dil relasch ein budgetai cun rodund 400’000 francs. Quels duessen vegnir curclai entras contribuziuns dil Cantun e da fundaziun sco era da donaziuns e contribuziuns dils commembers. Ord il relasch vegnan davos exemplars da stampats grafics da gronda valeta offeri. Cun la cumpra gideis Vus a realisar quei project. Il gudogn ord questa vendita va cumpleinamein a SPAZI SPESCHA:

scargar la broschura da vendita

scargar il talon d’empustaziun

Localitad d’exposiziun

Il baghetg erregius ils onns 1960 el sid dalla fabrica da ponn Trun dispona da pliras grondas hallas da producziun cun buna glisch.

L’emprem’alzada da 1000 m2 vegn concepida sco spazi d’exposiziun nua che las ovras ord il relasch digl artist vegnan exponidas alternontamein. Ella localitad annexa da ca. 140 m2 vegnan las ovras deponidas, documentadas  e restauradas.

OGNA e Spazi Spescha

Dapi 2013 stat sia pli impurtonta orva a Trun, ina sculptura transibla ch’ei vegnida realisada suenter sia morta.  Cun OGNA lai igl enconuschent artist Matias anavos in’ovra unica cun gronda radiaziun e calamitad. Tenor siu giavisch eis ella accessibla tut il temps.

Cun Spazi Spescha sesiara il cerchel. Spazi Spescha ed OGNA porschan in’investa unica e profunda dalla lavur artistica da Matias Spescha.

Dapli davart OGNA e Matias Spescha